BLOG / 20.08.2025

Qualitéitsversprieche JANS – Didier Lejeune a säin A fir den Detail

Wann et dorëms geet, fir eist Versprieche bei JANS duerchzesetzen, fir mat Qualitéit an héije Standarde vir mat dobäi ze sinn, da spillt eng Persoun eng ganz entscheedend Roll: den Didier Lejeune – hien ass zanter 13 Joer feste Bestanddeel vun eiser Ekipp bei JANS.

„Den Didier ass an eisem Team net ewechzedenken. No esou ville Joren Zesummenaarbecht ass eng grouss Vertrauensbasis entstanen, op déi ee baue kann – wuertwiertlech“, sou de Gerant Steve Jans.

Erfarung am Gepäck

Den Didier Lejeune koum am August 2012 bei JANS. Bis zu dësem Zäitpunkt huet de geléierten Techniker schonns e puer Joer an enger grousser Baufirma als Direkter vun der Heizungsdepartement geschafft – e Beräich, deen hien och bei JANS iwwer eng länger Zäit geleet huet. De Wiessel op Eschweiler huet fir den Didier awer och ganz nei Aufgaben an Erausfuerderunge mat sech bruecht. Wéi de Grënner vu JANS, de Claude Jans, du gefrot huet, ob den Didier sech am Beräich vu JANS Immobilière abrénge wéilt, huet de Belsch net laang gezéckt an zougesot.

„Et ass natierlech flott, wann engem esou vill Vertrauen entgéintbruecht gëtt“, sou den Didier, deen dagdeeglech fir säin Job aus Burg-Reuland bei den Noper op Lëtzebuerg schaffe kënnt. Kuerzer Hand huet de Belsch du säin Diplom als Immobilien-Expert ofgeschloss – iwwer e Joer laang huet hien dofir, nieft der regulärer Schaffzäit, eng Owesschoul besicht. „Et ass wichteg, sech ëmmer weiderzebilden a beim Thema Immobilien och gesetzlech Bescheed ze wëssen, wat ee kann, dierf a muss.“

Vu Vertrauen a Kontroll

Iwwer sämtlech Ofleef Bescheed ze wëssen, ass fir hien als Qualitéitskoordinator och bei der Schlusskontroll vun Immobilien extreem wichteg. „Um Dag vun der Iwwergab un de Client soll alles komplett fäerdeg a perfekt sinn, ouni dass iergendeng Reschtaarbechten néideg sinn“, erkläert de 54-Järegen. Genee hei kënnt den Didier an d’Spill: E puer Woche virun Ofschloss vum Schantje préift hien, ob den Zäitplang an déi intern Qualitéitsstandarden agehale goufen, ob Noaarbechten néideg sinn a wat fir eng Corps-de-metieren ënner Ëmstänn nach Gas musse ginn.

„Mir bei JANS probéieren ëmmer, eis ze verbesseren. Wien dagdeeglech um Schantjen ass, gëtt iergendwann ‚betribsblann‘. Wann dann nach eng zweet Persoun mat driwwer kuckt, ass dat e grousse Virdeel a Feeler kënnen evitéiert ginn.“ Wat den Ofschloss méi no kënnt, wat all Detail vum Immobilienexpert méi akribesch iwwerpréift gëtt: Passt de Faarftoun bei d’Dier? Ginn d’Fënstere richteg zou? Funktionéieren alleguer d’Schaltere vun de Luuchten, de Rolllueden an ass un de Maueren a Plaffonge gutt geschafft ginn?

A Form vun engem Protokoll ginn all dës Punkte festgehalen a bei Bedarf kann da mam responsabelen Techniker geschwat gi fir Nobesserungen. Op dës Manéier kënne mir sécherstellen, dass bis zum Fäerdegstellen och déi klengste Mängel behiewe kënne ginn a mir déi Perfektioun a Qualitéit garantéieren, déi eis Clientë vun eis kennen – an erwaarden.

Allrounder – am Job a privat

Den Didier ass frou mat der Villsäitegkeet vu sengem Job – ob um Schantjen oder am Büro, ob mat Clienten oder Kolleegen. Dobäi ass den zweefache Familljepapp net just fachlech, mä och sproochlech op der Héicht: Nieft senger „Mammesprooch“, dem Eifeler Dialekt, schwätzt hie Lëtzebuergesch, Däitsch, Franséisch, Englesch an Hollännesch. „Meng Elteren hu vill Wäert drop geluecht, dass mir Kanner vun Ufank u sproochlech gefërdert goufen.“

Nieft dem Sproocheléiere fiert den Didier gär mat sengem Quad, këmmert sech ëm déi eege véier Wänn oder moderéiert weekends als Benevole bei engem lokale Radiosender.

Duerch seng Sproochen a Villsäitegkeet, seng laangjäreg Experienz a säin A fir den Detail dréit den Didier onmoosseg zu der Erfëllung vun eiser Visioun bei JANS bei: Déi héchste Qualitéitsstandarden ze bidden an doriwwer eraus ëmmer nach dagdeeglech e Stéckelche besser ze ginn.