Bei der Gestaltung vum Eefamilljenhaus stoungen d'Wënsch vun den zukünftege Bewunner vun Ufank un am Mëttelpunkt. Vun der Planung iwwer den Design bis hin zur Realisatioun huet JANS de Projet ganz no de Virstellunge vun der Famill ëmgesat. An d'Famill konnt d'Aarbechten zu all Moment genee suivéieren, well si direkt niewendru gewunnt huet. Hiert neit Doheem ass op där Plaz entstanen, wou virdrun nach eng Garage stoung. Och ëm den Ofrëss vun der Garage huet JANS sech gekëmmert.
Natierlech wunnen: E Massivholzhaus mat Charakter zu Sëll
En Doheem, dat scho beim Betriede Rou a Gebuergenheet ausstraalt a ganz op déi perséinlech Wënsch a Besoine vun de Bewunner ofgestëmmt ass – dësen Dram huet JANS fir d'Famill Kieffer verwierklecht. Dat neit Holzhaus iwwerzeegt dobäi scho vum éischten Ament u mat sengem eenzegaartege Charme.
Alles aus enger Hand
De Schlëssel zum Erfolleg war, wéi bei alle Projete vu JANS, déi reiwungslos Koordinatioun vun alle bedeelegte Corps-de-metieren. Holzbau, Daachkonstruktioun, Bannenausbau oder elektresch Installatiounen – all d'Aarbechten hunn impeccabel aneneegegraff. Dat huet och d'Bauhärin begeeschtert: „Wat bei der Zesummenaarbecht mat JANS wierklech super war, war déi gutt Koordinatioun tëschent allen Ekippen. Soubal eng fäerdeg war, huet déi nächst iwwerholl, egal ob et ëm d'Elektroinstallatiounen, d'Buedem- oder d'Holzaarbechte goung. Alles ass reiwungslos ofgelaf.“
Mee net nëmmen d'Zesummenaarbecht, och dat fäerdegt Eefamilljenhaus suergt fir Begeeschterung: D'Massivholzkonstruktioun gesäit net nëmme gutt aus, se schaaft och eng gemittlech Ambiance an e gesond, agreabelt Raumklima. „Holz huet e positiven Afloss op d'Raumklima. Wann d'Loftfiichtegkeet héich ass, hëlt d'Holz d’Fiichtegkeet aus der Loft op – an ëmgedréint. Wann d'Loft am Haus dréchen ass, gëtt d'Holz déi gespäichert Fiichtegkeet nees un d'Loft of“, erkläert den Architekt Dennis Scholer.
Mä dat ass net deen eenzege Virdeel vun der CLT-Bauweis. Och individuell Gestaltungswënsch kënnen optimal ëmgesat ginn, esou de Scholer weider: „D'Positioun vun de Steckdousen oder Liichtschalter kann esou ganz einfach no de Wënsch vun de Clienten ugepasst ginn. D’Plazen an der Mauer, an deenen dono d'Kabele verluecht oder d'Steckdouse montéiert ginn, ginn nämlech schonn am Viraus an d'Holzplacke gefrääst.“
Eng Oas vun der Rou
Datt dat neit Doheem zu enger richteger Oas vun der Rou géif ginn, war wéinst senger Lag net selbstverständlech. Schliisslech läit d'Grondstéck direkt un enger staark befuerener Strooss. Dank enger duerchduechter Planung ass dovunner bannen am Haus awer kaum eppes ze spieren: „Ech hu mech hei direkt wuelgefillt. Et ass en Doheem, an deem eng ganz positiv Atmosphär herrscht. Jiddereen, dee mech bis elo besicht huet, huet dat genee esou empfonnt.“
Gläichzäiteg füügt sech dat neit Gebai harmonesch an d'Ëmgéigend an. „An Uertschafte wéi Sëll ginn et vill ländlech Haiser an dobäi och Virschrëften, wat d'Erscheinungsbild ugeet. Dowéinst hu mir eis och mam Denkmalschutz ofgestëmmt“, erkläert de Scholer. D'Wiel ass dofir op en Daach mat Schifer gefall, dee vun den Daachdecker-Spezialiste vu JANS realiséiert gouf. Esou füügt sech dat neit Doheem perfekt an d'Noperschaft an a bitt alles, fir sech ronderëm wuelzefillen – bannen ewéi baussen.
