De Grondstee gouf vum Claude Jans geluecht, wéi hien den 1. Mee 1991 d’Bau- a Baumaterialentreprise „Constructions Claude Jans“ gegrënnt huet. Mat der Entscheedung, sech selbststänneg ze maachen, huet den deemools 34 Joer jonke Familljepapp eng wichteg Eegenschaft bewisen, déi JANS bis haut präägt: de Courage, fir Verännerungen unzegoen.
„Ech mengen, dat ass eppes, wat eis auszeechent. Mir probéieren, fir eis ëmmer nees an alle Beräicher a Fro ze stellen a besser ze ginn. Mat dëser Astellung hu mir vill Erausfuerderunge gemeeschtert“, seet de Steve Jans, den haitege Gerant vu JANS. Wéi säi Papp de Familljebetrib gegrënnt huet, war de Steve eréischt zwee Joer al an d’Personal konnt een un enger Hand ofzielen.
JANS – Eng Geschicht gepräägt vu Courage an Innovatioun
Iwwer 30 Joer voller Iddien, Erausfuerderungen a gemeinsamen Erfolleger – a kee Joer war wéi dat anert. Genee dat mécht d’Geschicht vu JANS aus. Zanter der Grënnung huet de Betrib sech ëmmer nees nei erfonnt, Chancen ergraff a sech iwwer zwou Generatiounen ewech zu enger fester Gréisst an der lëtzebuergescher Bau- an Immobiliebranche entwéckelt.
35 Joer méi spéit schreiwe méi wéi 200 engagéiert Mataarbechterinnen a Mataarbechter all Dag un der Erfollegsgeschicht vu JANS mat. Zesumme verfollege si een Zil: Fir hir Clientë Liewensraim ze schafen, an deene Mënsche sech doheem fillen. Iwwer 900 Projete goufen zanterhier realiséiert. Aus dem fréiere klenge Betrib ass eng etabléiert Entreprisegrupp entstanen, déi duerch dat perfekt Zesummespill vun hiren Departementer a Fachberäicher souwéi duerch en enormt Fachwësse Qualitéit op héchstem Niveau liwwert.
Ee vun den éischte Meilesteng geet op d’Joer 1998 zréck. JANS hat sech zu deem Zäitpunkt schonn en Numm als Baufirma gemaach a Projeten am privaten an am ëffentleche Beräich an der Regioun realiséiert. Mat der Grënnung vu JANS Immobilière huet d’Entreprise Projeten net méi nëmmen als Baupartner begleet, mee och als Projetentwéckler – en ëmfaassenden Usaz, dee bis haut fest an der DNA vu JANS verankert ass.
D’Ufuerderungen un de Bau hunn sech iwwer d’Joerzéngte verännert – a JANS huet sech mat verännert. Fir den ëmmer méi héijen Ufuerderunge vu moderne Bauprojete gerecht ze ginn, goufe weider spezialiséiert Geschäftsberäicher opgebaut, dorënner JANS Energies (2007) a JANS Toitures (2011). Aktivitéite wéi d’Installatioun vun Heizungssystemer, d’Ausféiere vun Elektroinstallatiounen oder den Daachbau ginn zanterhier direkt vu JANS ofgedeckt. Dësen ëmfaassende Service suergt fir Qualitéit, Effizienz a Vertrauen.
A JANS wiisst weider – als Entreprise, als Famill an als Ekipp. An dat bezitt sech net nëmmen op d’Projeten, mä och op den Engagement no bannen an no baussen. Esou sti Fiabilitéit, Verantwortung an e fairt Mateneen am Mëttelpunkt vum Wierke vu JANS. Respekt, sozial Verantwortung a Qualitéit prägen dat dagdeeglecht Handele vun alle Bedeelegten. Op dësem Fundament wäerten och an Zukunft architektonesch usprochsvoll Bauprojeten ëmgesat ginn, mat der Ambitioun, nohalteg Wäerter ze schafen.
All dat wier awer net méiglech ouni déi sëllege Mënschen, déi eis Geschicht gepräägt hunn a weider prägen: eis Mataarbechterinnen a Mataarbechter, eis Clienten an all eis Partner. Hiert Vertrauen, hiert Engagement an hir Ënnerstëtzung hu JANS zu deem gemaach, wat d’Entreprise haut ass.
