Dobäi spréngt d’Sabrina Bügler allzäit do an, wou Nout um Mann ass. “Wa well een op mech duerkënnt, da brauch d’Persoun Hëllef – an ech hëllefe gär mat mengem Wëssen.” E Groussdeel vu Sujeten, dee bei si op den Dësch kënnt, ass delikat – virun allem, wann et ëm detailléiert Ufroe fir Subventioune fir Photovoltaikanlage geet.
Pabeierbierger & Photovoltaik-Boom
E Subventiounsprogramm vum Lëtzebuerger Staat erméiglecht et den Hausbesëtzer, e Groussdeel vun de Käschte fir eng PV-Anlag rembourséiert ze kréien. Virausgesat, d’Paperasse stëmmen. “De ganzen Oflaf ass scho komplizéiert, do muss alles passen. Wann iergendee Feeler dran ass, kommen d’Pabeiere komplett zeréck an alles geet vu vir un.”
Rechnungen, wichteg Donnéeën, genee Angaben iwwer Modell, Wäerter a Leeschtung vun der Anlag: D’Sabrina Bügler steet de Clientë mat Rot an Dot un der Säit. Dacks geet et dobäi och ëm vertraulech Donnéeën. An enger Zäit, wou et vill Bedruch a Fälschunge ginn, ass de perséinlechen Drot an d’Vertrauen ëmsou méi wichteg. “Wann d’Clienten eng Bestätegung kréien, datt ech d’Baugeneemegung ugefrot hunn, da wësse si, datt alles seng Richtegkeet huet an ech meng Aarbecht gemaach hunn”, féiert si weider aus.
De komplette Prozess, vun der Baugeneemegung iwwer d’Bestätegung vum Optrag bis hin zum Montage vun enger PV-Anlag, ass laang a bürokratesch. “Et gi vill Kontrakter z’ënnerschreiwen, déi deelweis 30 bis 36 Säite laang sinn. Déi sinn dacks schwéier ze verstoen.” Mä de Run op d’Anlagen ass grouss – ongeféier dräi fäerdeg Projete gi pro Woch vun hir geréiert. Dobäikommen nach 100 Anlagen, déi op hire Montag waarden. “Mir si wäit am Viraus mat de PV-Anlagen ausgebucht”, sou déi 44-järeg JANS-Mataarbechterin, déi well als Gestionnaire an engem Grousshandel geschafft huet.
